Lideri në La Liga ka fituar në përmballjen ndaj klubit në fund të tabelës mbrëmjen e së shtunës në Camp Nou.

Barcelona ka regjistruar fitore edhe në ndeshjen e xhiros së nëntë duke mposhtur me rezultat 2 me 0 Malagan në Camp Nou për të vazhduar e pamposhtur këtë sezon në La Liga, shkruan portali arbresh.info.

Gjiganti katalunas shënoi për 1 me 0 në minutën e 2′ të ndeshjes përmes Gerard Deulofeut. Edhe pse asistimi nga Lucas Digne erdhi pasi topi kaloi vijën fundore, gjyqtari mendoi ndryshe dhe goli u pranua.

“Blaugranët” dyfishuan epërsinë pas golit nga Andres Iniesta (56′), i cili gjeti portën në La Liga pas dy viteve qysh pas golit që kishte shënuar në fitoren 4 me 0 të Barcelonës kundër Real Madridit në nëntor të vitit 2015.

Mjeshtri i mesfushës dhe kapiteni i skuadrës shënoi gol të bukur pas asistimit nga superylli Lionel Messi.

Barcelona tani ka 25 pikë në krye të tabelës, ndërsa Malaga vazhdon në pozitën e 20-të me vetëm një pikë./arbresh.info/

https://streamable.com/ch399